نوێژەن کردنەوەیەک
کاروانی مۆسیقای کوردی لە هەر شوێن و زەمەنێکی ئەم کوردستانە بەردەوام بە ڕێوە بووە. لە یاد ناچن ئەو ڕۆژانەی کە حکومەتان تەنگ و چەڵەمەیان دەخستە بەر پەرەپێدانی زمان و کولتووری کورد. لەو ڕۆژانەدا بوو کە هونەرمەندان لە هەر دەرفەتێک کەڵکیان وەردەگرت و بە نهێنی ئاوازیان بۆ تێکستێکی شاعیرانی نیشتمانپەروەری کورد ساز دەکرد. دەیانخوێند و لە ناو ماڵاندا بڵاو دەبۆوە.
ئەوە هونەرمەندان بوون کە لە زەمەنی وا ئەستەمدا پەیمانی وەفاداری خۆیان دەگەڵ نیشتمان و نەتەوە نوێ دەکردەوە، گۆرانی و حەیرانیان دەگوت و ورە و ئەڤینیان لە ناو جەماوەردا زیندوو ڕادەگرت. لەم بەرهەمانە زۆرن کە لە سووچێکی مێژوودا بە بێ بوونی ئامرازێکی مۆسیقا تۆمار کران. هەر چەند کە تام و چێژ و کۆمەڵێک بیرەوەری خۆش و ناخۆش دەگەڵ خۆیان دەکەنە میوانی هەر مێشکێک، بەڵام هەرکات جێی داخ و پەژارەش بووە کە بوار نەبوو بە شێوەیەکی پسپۆڕانە تۆمار بکرێن.
Read More »نوێژەن کردنەوەیەک