هۆنراوەی مامۆستا سەید محەممەد ئەمین بەرزەنجی ناسراو بە (خاڵە مین)
بولبولم وا لە قەفەس هاتە دەرێ
«ماملێ»م پێی بڵێ دا بێتە سەرێ
بورینگێنی بە دەنگی نەرمی
دڵ ببرژێنێ هەناسەی گەرمی
بچریکێنێ بە دەنگی خۆشی
بڕفێنێ لە دڵی کوڵ هۆشی
ڕاڕفێنێ لە دڵان دەرد و پەرۆش
پێبکەنێ ڕۆڵە لە دەسچووی ڕەشپۆش
ڕاپەڕێنێ هەموو ئاخ و داخێک
ئاخ و داخێکی لەسەر دڵ شاخێک
دەنگی وا خۆش و چریکەی بازی
«ئەزغەر» و «باربود»ی پێنازی
لەنگەری دەگرێ بە باڵداری حەوا
«مریەمێ» کاتێ دەخوێنێ بە هەوا
«سوورەگوڵ»، «لالە بە دەست»ت چاکە
«جوانەمەرگت» ئەوە مینای خاکە
«یار یار»ت گوڵە فێنکایی دڵە
دەنگی تۆ دوژمنە بۆ مشک و مڵە
«خاڵی ڕێبوار» و «هەڵاڵە و زەمزەم»
بڵێ گۆرانی بە کوردی دەم دەم
خاڵە گیان دەمدەمە تۆش بۆی بوەنە
تاکوو ساڕێژ بێ لە دڵ ئەو کەوەنە
خاڵی خۆشت کە بە دەنگت مەستە
دڵی مەشکێنە لە دنیا بەستە
«ماملێ» بولبولی کوردستانە
هەر بژی، نەمری ڕەبی بەو زووانە
دەی دەی ئەو دەنگی بریندارت بێ
دڵبرینداری مە هەر کارت بێ
تاکوو نیشتمان بێ بە بەزمت ئاوا
نیشتمان گیانی من ئەوڕۆت باوە
نیشتمان ڕیشەیی جەرگ و دڵی مەی
مەسەلی کوردییە ئاو و گڵی مەی
خاڵی من چونکێ گەلی دەربەدەرە
شەو و ڕۆژ خواردنی خوێنی جگەرە
گەر دەڵێی چۆن دەخورێ خوێنی جیگەر
خوێن بەشی خواردنی کوردانە مەگەر
بەڵێ خوێن جەرگە بە فرمێسک ئەڕژێ
لە گلێنەم دە گڵێنەم دەپژێ
ئەی خودای گەورە هەڵینەگری لەوان
نۆرەی گۆرزی مە بدەی ڕۆژ و شەوان
ئینچەلیشبێتەوە نۆرە و کەڕەتن
تاف و ماف و هەل و هات و هەڕەتن
هۆنراوەی مامۆستا سەید محەممەد ئەمین بەرزەنجی
ناسراو بە (خاڵە مین)
٣ بە مناسبەی رهابوونی (ماملێ) لە (ساواکی) جەهەنەمی (محەممەد ڕەزاشا)
