لە چەند ڕۆژی ڕابردوو دا لە لایان بەڕێز شاڵاو کۆسرەت ڕەسوڵ چەند وێنەیەکی دەگمەن بڵاو کرانەوە کە لە ناوی دا هونەرمەند محەممەد ماملێ و هاوسەرەکەی ئامین خانم تێیان دا دەردەکەون.
هەروەها لەم وێنەیەدا کۆمەڵێک شۆڕشگێر و کەسایەتی ناوداری کوردی ڕۆژهەڵات و باشووریی کوردستان دیارن وەک شەهید تەحسین کاوانی، شەهید محەممەد حەلاق، کۆسرەت ڕەسوڵ، عەلی یاوەر، دوکتور عەلی و مریەم خانی هاوسەریان و …
ئەم وێنانە لە ڕێکەوتی ٢٧ی٦ی١٩٩٠ لە ناوچەی “دۆڵی ئافان”ی سەر بە شاری مەهاباد چرکێندراون. لەو ڕۆژە دا پێشمەرگەیەکی باشووری کوردستان لە شاری مەهاباد زەماوەندێکی ساکار و پێشمەرگانە ساز دەکات و ماملێش کە هەردەم بە بیرێکی نەتەوەیی دەیڕوانییە پارچەکانی تری نیشتمان، بە دڵێکی خۆش و گەورەوە لەم زەماوەندە دا بەشداری کرد و بە چڕینی چەند گۆرانییەک لە خۆشی و شادی ئەم پێشمەرگانە دا ڕۆڵی گێڕا و دڵیانی شاد کرد و بۆی کردن بە بیرەوەری. ماملێ و بنەماڵەکەی بەردەوام دەرگایان لەسەر گازەرەی پشت بوو تا برایانی باشوور هەست بە غەریبی نەکەن و بەم کارەش ڕۆحی نەتەوەیی لە ناو کورد دا گەشە پێبدات و ئەو بیرە بڕەو پێبدات کە کوردی هەموو پارچەکانی خۆیان بە خاوەنی پارچەکانی تری کوردستان بزانن.
ئەم هەڵسوکەوتەی ماملێ بێجیاوازی بیر و باوەڕ، هەموو لایەنەکانی دەگرتەوە و بەیەک چاو لە هەموویانی دەڕوانی و هەموویانی وەک یەک خۆشدەویست و بە ڕۆڵەی ئەو خاک و نیشتمانەی دەزانین.
یەک لە گەورەترین ئاواتەکانی ماملێ ئەو بوو کە ئەم ڕۆژە ببینێت تا بە ئازادی لە چوارچرای مەهاباد سواری پاس بێت و لە هەولێر و سلێمانی یا دهۆک و دیاربەکر دابەزێت.
بەو هیوایە ئەم ئاواتەی ماملێ بێتە دی و کورد یەکماڵ و یەکدڵ بگا بە ئاواتەکانی.
