ئەمڕۆ ڕێکەوتی ٣٠ی مای ٢٠٢٢ کاک دڵزار عابدی، هونەرمەندی دەستڕەنگین، کارجوان و لاوی سەقز بەرهەمێکی ماملێی تازە کردۆتەوە و بڵاوی کردەوە. وێڕای دەستخۆشی لەو هونەرمەندە بەهەڵوێستە ئێمەش پێشکەشی ئێوەی هونەردۆست دەکەینەوە.
لەو ڕۆژەوە دوور کەوتەوە سایەت لەسەری من
سووتاوە لەتاوت هەموو جان و جگەری من
جەرگم هەموو لەت لەت بوو بە سێڵاوی سروشکم
چ بکەم کە بە دەریا چووە لەعل و گوهەری من
دەیفەرموو لەسەر خاکی دەری خۆی کە منی کوشت:
جەننەت بەسە بۆ خوێنی شەهیدی نەزەری من
قەد وا دەبێ خاکی دەری تۆ تاجی سەرم بێ؟
ئەو دەوڵەتە بۆ من نییە، هەی خاک بە سەری من!
زولفت کە وەکوو شامی غەریبانە لەوێدا
حاڵی چییە داخۆ دڵەکەی دەربەدەری من؟!
وەک بولبولی شەیدا بە هەزار نەغمە دەناڵێم
جارێکی گوڵم گوێ بدە ناڵەی سەحەری من
دیم هاتە عەیادەت دەمی پڕ خەندە بوو یەعنی
ڕۆح و دڵی بیمارە دەوای گوڵشەکەری من
بێ نۆرە دڵم هێندە لەسەر یەک مەشکێنە
ڕوو وا بکە شەوقێکی بدا تا فەنەری من
زولفت سەبەبی جەزبی دڵم بوو، بە برۆی تۆ
کافر بووە بۆ قیبلەیی من ڕاهبەری من
خۆش بەو دەمە ساقی لە دەری مەیکەدە فەرمووی:
ئەو جامە لە من بگرە وەفایی بەسەری من
