نووسینی: شاهۆ بەستاڕ
گەورەیی و بەرزی هونەری مامۆستا ماملێ و کەڵە هونەرمەندانی وەک وی، کاتێک بەرچاوتر دەبێ و خۆ نیشان دەدا کە بڕوانینە هونەری مرۆڤی ئەو سەردەمە و بە تایبەتی، مۆسیقا.
کێشە گەورەکەی هونەرمەندی ئەوڕۆ خوڵقاندنی بەرهەمێکە کە ئازایانە بە تێپەڕبوونی کات، ڕەنگ و ڕووی خۆی بپارێزێت و تام و بەرامی خۆی لەدەست نەدا و دەڕبڕی هەستی گەنج و پیر، شاز و ناشاز و ژن و پیاو بێ.
دیارە کە مرۆڤی ئەو سەردەمە لەچاو ٤٠ـ٥٠ ساڵ پێش زۆری گۆڕانکاری بە سەرداهاتوە، بەڵام هونەری ماملێ ئەو سنوورانە ناناسێ. شتێک کە دەبێ ئاماژەی پێ بکرێ، گۆڕانی زەوقی خەڵکە. وێدەچێ زەوقی مۆسیقایی مرۆڤی ڕابردوو لە مرۆڤی سەردەمی ئێستا زۆر بەهێزتر بووبێ و ئەوان چاتر توانیبێتان دەنگی خۆش و ناخۆش لێک کەنەوە و هەر ئەوە ببێتە هەوێنی ناودەرکردنی درووستی هونەرمەندێک.
بەڵام زەوقی خەڵکی ئێستا چۆناوچۆن لاواز بووە؟! بەگشتی مێشکی زۆرینەی خەڵک لەژێر کاریگەری و باندۆری قورسی مێدیاکان و ئینترنێت و سۆشیاڵ مێدیا وەک
بەشێک لە ئینتێرنێت دایە. مێدیاکان کە ئەرکی ئامادەکردنی خۆراکی فکری و زەینی بۆ خەڵکیان هەیە بەهۆکار گەلێکی جۆراجۆر لە بەرژەوەندی خۆیان و هەندێ کەس، بەرهەمی لاواز بڵاو دەکەنەوە کە پاش ماوەیەکی ئێکسپایەر دەبن و لەبیر دەچنەوە.
لایک و کۆمێنت و فاڵۆوێری درۆ ،هەمان خێڵی درۆ لە سۆشیال مێدیا دا، بۆتە پێوانەی باشی و خراپی بەرهەمێک یان هونەرمەندێک. بەپێچەوانە، لە سەردەمی ماملێ و حەسەن زیرەکەکان دا، کەس لە پڕێکی نەدەبوو بەکوڕێک، بەڵکو تەنیا بەهرەی زاتی بوو کە دەبوو بە هۆی ناودەرکردنی هونەرمەندێک.
٢٧/٠١/٢٠١٧
