هۆنراوەی: ئێقباڵ مۆحەممەدی
لە ڕێبەندانی هیجری تۆ “هەواری خاڵی” غەوغا بوو
( هەموو بازار و “شاری دڵ” کەوا بێ شەوق و سەودا بوو)۱
“بەهار خۆشە” نەپاش کۆچت، نە پاش زستانی ژینی تۆ
نە سەیران و نە حەیران ما، نە قاسپەی کەو لە شینی تۆ
بەڵێنت گرت لە دڵدارت بەرەو جێ ژوانی هەرمان چووی
بە داخن “دەستەیی عاشقان” بە “ڕێبوار”ی لە دەسمان چووی
دەمێک ساڵە بەڕێز “لەیلا” بەهیوای کاغەزی تۆیە
قورینگان هات و چوویانە،گووڵاڵە سوورە بێ بۆیە
لەپاش دەنگت نییە دەنگێ بکا یادێ لە “هیجری یار”
نەوایێ خۆش بلاوێنێ دڵی سەد عاشقی خەمبار
مەخابن سەد مەخابن وا کە پیری عاشقان ڕۆی
کە دەنگی (هێمن) و (گۆران) و (ئاوات)ی دڵان ڕۆی
ئەگەر چی تۆ بەجێت هێشتین و هەر شادی لەدڵ دەرچوو
(فۆغان بوو، ناڵە بوو، خوێنی جگەر بوو، دیدەیی تەڕ بوو)٢
بەڵام دڵخۆش بەوەین گیانا، بە حەوسەد کۆرپە گۆرانی
لەباوش بیری یارانی، لەدڵ ناچی، لە لامانی
ئێقباڵ مۆحەممەدی. بەفرانباری ٢٠١٦ی زایینی
ـــــــــــــــــــــــــــــــــــــــــــــــــ
۱و٢ تێ هەڵکێش.مامۆستا ئاوات
“ ” گۆرانیەکانی ماملێ
