(ئەو دەنگە ئەفسوناوییەی لە بەهەشت و دۆزەخی کورد ، خۆیەوە هاتووە)
مامۆستا شێرکۆ بێکەس
لە دەراڵ و ماهەکانی دەڤەری موکریانی ئەوین دا
لە بنارە بە گیا و گوڵ و بژوێنەکانی هونەری ئەم وڵاتەسەر بە تەم و خەمگینەدا
هەر کۆترە شینکەی ئاوازە و لە شەقەی باڵ دەدەن و
هەر پۆلە کەوی ناو گەرووی بەفرە و
هەڵ دەفڕێ،
موکریان لانکەی بەردینی
بەیت و داستان و مەقامە ڕەنگ ئاڵەکانی ناو
ئەم زمانە شیرینەی کوردە
ڕەنگە ڕەگ و بنیچەی
ئەم چریکە و دەنگ و بەیتانە
بچنەوە سەر سۆزی نزا و ناڵەکانی
سەما بە دەوری
ئاگری نێڵ نێل کردووی
ئاگردانی موغی زەردەشت و
گاتاکانی نوێژی خۆشەویستی
بۆ مەزدای رووناکی و
بۆ یەکەم ماچە گزینگی بەیانیانی سەر ئەو لوتکە
موکریان و گۆرانی
موکریان و ئاواز
موکریان و دەنگی خۆش
وەک پێکەوە لە دایک بووبن وایە
قوڵە قوڵی سەرچاوەکانی گەرووی ئەم هونەرەش
هەر لە ناو ڕنوو و بەفری
ئەوێوە هەڵ قوڵیون و
دواتر بە لووزەو
ڕژاونەتە گیانی کوردستانەوە
هونەرمەندی گەورە (حەمەی ماملێ)
جۆگە دەنگێکی ئەو بەفراوە و
قوڕەهاژەیەکی لە گۆی زەماوەندا زرینگاوەی
تاڤگەکانی مێژووی ئێمەیە
ئەو دەمەی گوێ لەو سووتانی رووحەی دەگرین
ئەو دەمەی ئەم سۆز و زایەڵە و کزەبای عەشق و باهۆزی دەربەندە دەبیسین
هەست ئەکەین
گۆمان ناوە بە لێدانی دڵی نیشتیمانەوە
گۆمان ناوە بە دار و بەردی ووڵاتەوە
گۆمان ناوە بە دەروونی کانی و زامی قووڵمانەوە
لەم دەنگە دا گووڵە گەنم و
دڵۆپە شەونم و
بێری جێژوان و
تاوڵ و هۆبەی کۆچەران و
هەڵقرچانی دڵدارانی ووڵاتی گووڵ و خۆڵەمێش دەبینینەوە
ئەم دەنگە خۆشە
لە بەهەشت و دۆزەخی ئاوێتە بووی کورد
خۆیەوە هاتووە
هەر لەبەر ئەوەشە
وەک کارێزە ئاوی ژێر زەوینی و بن و بێخی
رووەکە کێویلەکان
لە ناخ و قووڵایی دیرۆکی ئێمە دا زیندووە
دەنگ و هونەری (ماملێ)
بەردەوام ئەو بێشکەیە ڕادەژێنێت
کە رۆحی بێ ئۆقرەی دڵدارانی تێدایە
من بۆ خۆم
یەکێکم لەو کەسانەی
زۆر جار دەبمە گەڵایەکی دەم ئەو با و
دەمبات و دەمبات
من زۆر جار لە ناو ئەم دەنگە خۆشەدا تواومەتەوە و
بووم بە هەڵم و
دیسانەوە بە هەناسە ساردەکانی (ماملێ)
بومەتەوە بەو دڵۆپە بارانانەی
کە شێعری تازەیان لە دەفتەرما
رازاندۆتەوە
کە شێعری تازەیان لە دەفتەرما
رازاندۆتەوە
( شێرکۆ بێکەس)
