بۆ کۆچی دوایی مامۆستا محمد ماملێ
شاعیر: سلیمان مسرور
ڕێبەندانە ڕێگە سەختە ڕێگە بەند
زۆر دژوارە سەرکەوتنی لێژ و لەند
تەزووی ساردی زریان دڕە و بێ بەزە
بوونە قامچی شووڵی هەرچی دارگەزە
سڕدەکا تەرمی بێ گیانی هونەرمەند
نەیما ئیتر نەشئە و سەوزایی زەمەند
بە بێ وەی کە بەزی بێ ئەو بەزیو
لەشی بێ هێزی بێ قامچیش تەزیوە
کەسێکی دەرد و خەم کردبێ بەخێوی
چلۆن دەکرێ لەوی دوور بێ پەشێوی
دەوریان گرتووە شاگردان بەو ڕهێڵە
وەرە ماملێ توخوا جێمان مەهێڵە
هێمن ڕۆیی، هەژار ڕۆیی، ئەتۆ بۆ؟
لە جەرگی ئێمە هەڵدەستێنی بۆسۆ
حەقیقی و خاڵەمین ئاوڕێکی نادەن
لەگەڵ سەید کامیلی تاوێکی لادەن
هەموو ڕۆیشتن و ئەوتان بەجێ هێشت
بە جارێ دەردی هێجران و بەوی چێشت
هەر ئەو مابوو بتانگاتێ و گەیشتێ
هێمن لەوبەر هەژار یش لەو تەنیشتێ
لە دوای وی زەمزەمەی سیحراوی کوانێ
ببەین ئاهەنگی جێژوانی شوانێ
ئیترڕاوچی دەتۆرێن، ناچنە کێوی
بەکام ئاهەنگ بکەونە شوێنی چێوی
لە منداڵ لایەلایە هەڵبڕاوە
لە لاوانیش قەتار و لاوەلاوە
هەتا ماملێ بە جوانی بۆی بەیان بوو
تەشی ڕێستن لە شیرین چەندە جوان بوو
لە کانی ئاسکان ڕا دێنە خوارێ
بە لار و لەنجە کیژان گوێ بە گوارێ
کەچی کۆڵوانە شینن چاو بە گریان
دڵیان چەشنی کەبابە و بۆتە بریان
لە ژێڵا کاروانێک دێ بە ئەژمار
بڵێی کۆچێک نەبێ؟ کۆچی سووری یار
یارێکە دێت و دەڕوا و جێ دەهێڵێ
تەواوی پیرەکانی قەوم و خێڵێ
مریەمەی سابڵاخی گەر کوو مابا
بە تاوو و تین دەبا شینی گێڕابا
مەم و زین یش بە سیسی لەو کەنارەن
شەم و شەمزین غەمینن لەو بنارەن
نەما باران هەتا بارێ و بەڕێژەو
نەما گۆمی خولان بێنێت و گێژەو
وەفایی شیوەنێکی گەرمی پێیە
لە ماملێ باوەفاتر بۆ وی کێیە
لەوەیدواوە کێ ئەشعاری بە سۆزی
بلاوێنێتە گوێی هاوبیر و هۆزی
سولەیمان مەسروور – لە سەر میزی کاری بانکی کەشاوەرزی.
پێش تەسلیم بە خاک کردنی مامۆستا ماملێ.
مەهاباد
ڕێبەندانی ١٣٧٧
