کۆچبارت…، ماملێ

بولبولی کوردان ، حاڵت پەرۆشە
چریکەت ئەمرۆ کپ و خامۆشە
ئاواتت وابوو ، هەڵکەوێ هەلت
بە چاو بیبینی سەربەستی گەلت
ماملێ، دەهەستە، بۆ کز و ماتی
بۆ چاوەڕوانی یەک مەرگەساتی
زۆرت خزمەت کرد بە گەل و هۆزت
بە دەنگی خۆش و بە هەست و سۆزت
بێ دەنگ مەبە تێر بچریکێنە
دەشت و شاخ و کەژ، وەنەشە بێنە
بە بەستە و مەقام، بەو هەستە جوانە
کە وا ئارامی، دڵی کوردانە
ڕاوچیان ڕاواە، یان لایە لایە
کە هێشتا سۆزی، لە گوێمان دایە
ماملێ جێی ڕێزە، زەحمەتی کێشا
بۆ پێشکەوتی کورد، دائیم تێکۆشا
قەت ماندوو نەبوو ، هەردەم نەکشاوە
دەیڕوانی لە بۆ، ئاسۆی گەشاوە
سەد حەیف بۆ تۆ ئەی ماملێی دەنگ خۆش
جەماوەر بۆ تۆ، پەرۆشن پەرۆش
تۆدڵنیا بە هونەرمەندی کورد
ڕێبوارت زۆرن، ئازا و ژیر و ورد
ڕێی گەورە پیاوان، کوێر نابێتەوە
ڕێگا ژوو دەکا و شین دەبێتەوە
کۆچبارت لێنا، بەرەو گۆڕستان
لەوێش چاوەڕێن، هەڤاڵ و دۆستان
لای هاورێیانی، گیانی بە گیانی
هەژار و هێمن، دوو موکریانی
خاکتان لە باوەش، خۆتان گرتووە
رووحتان هەر زیندوو،نا، نەمردووە
ئێوە لەگەڵ یەک، هەواڵ و یار بوون
هەڵۆی تیژباڵی، دێهات و شار بوون
پێتان دەنازی، خاکی کوردستان
جێی زیارەتن، بۆ کورد و دۆستان
بێشکەی کوردایەتییە، گڵکۆکەی ئێوە
هەر تاسە بارن، دڵداری ئێوە
بۆکان
سەیدزادە خاقان قادری

بۆ ڕۆژی لە دایکبوونی مامۆستای گەورەی گەلەکەمان کاک محەممەدی ماملێ

پیرۆز بێ ڕۆژێ تۆ هاتی دنیا
خەڵاتی گەورە بە کوردان دریا
باخچەی دڵانت پڕ لە شادی کرد
دڵی غەمبارت پڕ ئازادی کرد
دڵی عاشقان وەک گوڵ گەشاوە
بە دەنگی خۆشت گوڵ ئاو دراوە
ئەوین و هەستت کە جێگەی ڕێزە
گوڵی هیواکەت پڕ بە ئامێزە

خاقان قادری

بۆکان – خاقان قادر