بەرۆ ئاسۆ

بۆ یادی ماملێ

فیدای سۆزی قەتار و لایەلایەت بم، ڕۆحی کوردان
فیدای نەغمە و سکاڵای نایەنایەت بم، قەڵای مەردان

ئەوینداران لەگەڵ دەنگی بلاوێنت دەناڵێنن
دەبارێنن لە داخی نامەردی، دەستلەیەکبەردان

بڵاون خێڵی کوێستانچی لە مەڵبەندی موکریانا
قریوەی نایە لەو خاکە قورینگی وێڵ و سەرگەردان

جەفاکاری دەکات گەردون لەسەر ئەو خاکە پیرۆزە
حەقیان نییە بچنە سەیری باخی شەقڵاوە و کراسزەردان

تەشیڕێسێکی وەک شیرین، خەشابی پێوەیە ئەمڕۆ
سەری قوربانی ئاڵایە و دەچێتە ڕاوی نامەردان

هەوایەکم نییە ئوستاد خەمی خاکم لەگەڵ دەرکا
سەبووری ئەو دڵەم نایە مەگەر هەر گڕ لەخۆبەردان

نووسینی: بەرۆ ئاسۆ