بە داخێکی گرانەوە هەواڵی کۆچی دوایی کردنی مامۆستا ئەندەریۆس ئیسرائیل خەمۆ ناسراو بە مامۆستا (باکووری)ـیمان لە هەولێر بیست. ئەو هەواڵە گەلێک ناخۆش بوو و ئێمەی لە خەمێکی قووڵدا نوقم کرد. مامۆستا باکووری لە ماوەی تەمەنی پڕشکۆی هونەری خۆیاندا، چ بە نووسین، چ بە ئافراندن و چ بە فێرکردن خزمەتێکی گەورەی بە هونەر و چاندی کورد کرد. هەر بەو بۆنەشەوە لە ساڵی ٢٠١٠ مەڵبەندی هونەریی ماملێ دووهەمین خەڵاتی خۆی پێشکەش بەو هونەرمەندە بەرزە کرد و لە شاری هەولێر مەراسیمێکی ڕێزلێنانی بۆ گرت.
ئێمە لەو مەڵبەندە و بە نوێنەرایەتی ماڵباتی ماملێ، سەرەخۆشی لە گشت گەلی کورد، لە خۆمان، لە بنەماڵەی سەربەرزی ئەو هونەرمەندە و گشت ئازیزان و نیزیکانی ئەو هونەرمەندە دەکەین.
یادیان هەرمان، ڕێگایان بەردەوام و ڕۆحیان شاد.
مەڵبەندی هونەریی ماملێ
٣/١١/٢٠٢٢
مامۆستا ئەندەریۆس ئیسرائیل خەمۆ (باکووری) کێیە؟
- لە ساڵی ١٩٢٨ لە شاری کۆیە لەدایک بووە و خوێندنی سەرەتایی هەر لەو شارە تەواو کردووە.
- ساڵی ١٩٤٧ دێن بۆ هەولێر و هەر لەو شارەش خوێندنی دواناوەندی لە ساڵی ١٩٥٠تەواو دەکات.
- ساڵی ١٩٥٠ دیسان دەگوازرێتەوە بۆ شاری کەرکووک، لەو شارە پێوەندی دەکات بە تیپی مۆسیقای (ئاشووری) و لە کۆمپانیای نەوتی I.P.C دوو ساڵان دەبێتە کارمەند. ئەو ماوەیە دەبێتە هەلێکی باش بۆ ئەو مامۆستایە تا خۆی فێری ئامێری عوود و چەند ئامێرێکی ژێداری تر بکات.
- لە ساڵی ١٩٥٢/١٩٥٣ دەچێتە بەغدا و لە کۆلێجی (دار المحلمین العالیە) لە بەشی زمانی ئینگلیزی وەردەگیرێ و چوار ساڵ دەوام دەکات و لە ساڵی ١٩٥٦ بڕوانامەی (لیسانس) لەو زمانەدا لە لایەن (مەلیک فەیسەڵی دووهەم)ـەوە وەردەگرێت.
- ڕێک لەو ماوەیەدا کە لە بەغدا بوو، پێوەندی بە ئێزگەی ڕادیۆ کوردی بەغدا کردووە و وەک گۆرانیبێژ وەرگیراوە.
- لە ساڵی ١٩٥٧ وەک مامۆستای زمانی ئینگلیزی لە شاری کۆیە و لە قوتابخانەی ناوەندی کوڕان دادەمەزرێت و وەک مامۆستا وانەی دەگوتەوە. مامۆستا باکووری هەر بەوەش نەدەوەستا و بۆ هەندێک قوتانی بەهرەدار وانەی موزیکی لەسەر ئەساسی بنەما و زانستی موزیک فێری موزیک کردن کە لە داهاتوودا ئەو بەهرەدارانە بوون بە یەکەم ئەندامانی تیپی موسیقای (باوەجی کۆیە) کە مامۆستا باکووری بونیاتی نا.
- لە ساڵی ١٩٦١ وەک مامۆستای ئینگلیزی گوازرایەوە بۆ شاری هەولێر. لەوێش دەگەڵ چەند مامۆستایەکی دەرچووی پەیمانگای هونەرە جوانەکانی بەغدا، تیپی موسیقای (دەرسیم)ـیان دامەزراند و سەرقاڵی کاری هونەر و موزیک بوون.
- لە دوای ڕاپەڕین، خانەنشین دەکرێت و لە وەزاڕيتی ڕۆشنبیری هەرێمی کوردستان وەک کارمەندی گرێبەست دامەرزا و لە تێلێڤیزیۆن و ڕادیۆکانی هەرێم دەستی کرد بە ئامادەکردن و پێشکەشکردنی چەندین پڕۆگرامی هونەری وەک (گۆرانیبێژە نەمرەکان) و ( دیداری هونەری).
- لە ١٤ ساڵی کۆتایی تەمەنیشیاندا وەک ڕاوێژکار هاوکار و ئەندامی (بنکەی مەقام) لە هەولێر بوو.
- لە ساڵی ٢٠١٠ دووهەمین خەڵاتی مەڵبەندی هونەریی ماملێی پێشکەش کراوە.
- لە بواری نووسین و لێکۆڵینەوەی هونەریدا، جگە لە کۆمەڵێک وتار بۆ گۆڤارەکان، تا ئێستا ١٠ کتێبی بە چاپ گەیاندووە کە بەشێکیان بریتین لە:
- بابه‌تێكی وه‌رگێڕان بووە له‌زمانی ئینگلیزییه‌وه بۆ كوردی به‌ناوی (چۆنیه‌تی گۆرانی گوتن)
- سێ به‌رگ له كتێبی (گۆرانیبێژە نه‌مره‌كان) كه پێكهاتووه له (699) لاپه‌ڕە و تێیدا ژیان و بەسەرهاتەکانی ( 47) هونه‌رمه‌ندی نه‌ته‌وه‌كه‌مانی نووسیوەتەوە .
- كتێبی چیرۆكی هه‌ندێ گۆرانی كوردی ڕەسه‌ن .
- كتێبی ته‌مه‌نێك ، گۆرانی و ئاواز و مۆسیقا و خۆشخوانی.
- كتێبی تیپی مۆسیقای باواجی كۆیه له (1957 تا 2008)
- كتێبی ئیزگه، مێژووی دامه‌زراندنی ڕادیۆی به‌غدای عه‌ره‌بی و به‌شی كوردی.
